Павэл і Эва – тыповыя прадстаўнікі свайго пакалення, якое без комплексаў рэалізоўвае ўласныя амбіцыі. Ён – без рэшты адданы працы, прагматычны, скіраваны на поспех. Яна – прывабная, інтэлігентная, поўная абаяльнасці, крыху стомленая тым, што паміж ёю і працаю муж часцей выбірае апошнюю. Але, здаецца, Эва пагадзілася са сваёй роляю: быць у ценю паспяховага мужа-бізнэсоўца. Але паміж імі ўжо няма тых пачуццяў, што былі некалі. Мы знаёмімся з Паўлам і Эваю, калі яны адпачываюць на яхце, і гэты адпачынак мае дапамагчы вярнуць тое, што калісці іх яднала. Сужэнцы сустракаюць сталага мужчыну, які якраз падводзіць горкі рахунак свайго жыцця. Багацце ягонага досведу пераважвае цынізм і расчараванне маладых. З жадання дапамагчы новым знаёмым, спадарожнік даволі радыкальнымі метадамі, але ўсё ж змушае пару пераасэнсаваць сваё жыццё і шлюб.