Усе французскія фільмы, як і песні, – пра каханне. Каханне, якое было даўно, цяпер падаецца Фанэт, гераіні фільму, адзіным, надзвычайным, чаканым. Былы каханы, якога яна не бачыла шмат гадоў, пакідае ёй дзіўную цыдулку, у якой прапаноўвае сустрэцца ў Нью-Ёрку, на апошнім паверсе Эмпайр Стэйт Білдынг – «зусім побач з раем». І Фанэт з Парыжу едзе туды... Але, магчыма, усё гэта толькі пагоня за прывідам шчасця, і калі-нікалі ёсць сэнс згадаць добрую амерыканскую песенку: «Калі ты не з тым, каго кахаеш, пакахай таго, хто побач з табою».