У гэтай сямейнай меладраме пераплятаюцца розныя сітуацыі, у якія трапляе 10-гадовы канадскі хлопчык Патрык і… ён жа, толькі ўжо пасталелы юнак. Гэтыя сітуацыі тояць у сабе пэўныя ўрокі жыцця, зразумець якія Патрыку дапамагае ягоная сям’я і сябры. Гісторыя Патрыка Бадэ – гэта гісторыя сталення аднаго чалавека, «звычайнага чэмпіёна», у якім глядач пазнае і самога сябе. Пытанне «Калі сэрца жыве, то ў чаканні чаго?» застаецца адкрытым цягам усяго серыялу. Магчыма, у чаканні будучыні, новых адкрыццяў, перамог і любові, бо «калі ўсведамляеш, як шмат для цябе нехта значыць, жыццё напаўняецца выклікамі і перажываннямі…». Зрэшты, рэжысёр і сцэнарыст Жан Мэрсье пакідае кожнаму права самому адказаць на гэтае пытанне.