Швейцарскі настаўнік гісторыі жыве ў Бэрне самым звычайным жыццём бяздзетнага разведзенага мужчыны: навучае ў школе, захапляецца вывучэннем моваў, збірае рэдкія кнігі, гуляе сам з сабой у шахматы. Аднаго дня па дарозе на працу ён сустракае дзяўчыну, якая спрабуе скочыць з мосту, яму ўдаецца ўратаваць яе і прывесці з сабою на заняткі. Аднак дзяўчына неўзабаве сыходзіць, пакінуўшы настаўніку толькі плашч, у якім той знаходзіць кнігу невядомага партугальскага аўтара, а ў ёй - два квіткі на начны цягнік да Лісабону. Зачытаўшыся кнігаю, настаўнік пастанаўляе кінуць свае працоўныя абавязкі і паехаць у Лісабон, каб паспрабаваць адшукаць аўтара кнігі, а таксама - след таямнічае дзяўчыны.