Прататыпам манаха Браткі стаў францішканін Алёйзы Касіба, збіральнік ахвяраванняў кляштару ў Велічцы, яго называлі апекуном убогіх. Падзеі фільму заснаваныя на сведчаннях відавочцаў ягонага жыцця. З галоўным героем мы знаёмімся ў яго апошнія дні, калі Братка развітваецца з зямнымі сябрамі ды рыхтуецца да вечнасці. Рэтраспектыва адкрывае перад намі незвычайную постаць: у біяграфіі манаха няма ані цудаў, ані славы. На экране мы бачым толькі, як ён цягам усяго свайго жыцця збірае драбінкі святасці: моліцца за ўсё і за ўсіх, дапамагае бедным, корміць іх, навучае малітвам дзетак і збірае міласціну на касцёл. Манаскае жыццё як адасоблены і таемны свет, які заўсёды выклікае цікаўнасць, тут паказваецца ў звычайным, людскім вымярэнні.