Фільм зняты паводле кнігі Ядвігі Станьчаковай «Дзённік на дваіх».Воляю лёсу аўтарка стала блізкаю сяброўкаю вядомага польскага паэта другой паловы мінулага стагоддзя Мірана Бялашэўскага. Сляпая Ядвіга жыве са старым бацькам, чыя безупынная апека фактычна пазбаўляе яе самастойнасці. Але сустрэча з Бялашэўскім змяняе яе жыццё. Эксцэнтрычны паэт, як выяўляецца, яшчэ менш прыстасаваны да паўсядзённасці, чымся Ядвіга. Ягоная бездапаможнасць актывізуе жанчыну: яна становіцца сакратаркаю Мірана, на слых друкуе на машынцы творы, надыктаваныя на магнітафон, пачынае весці дзённік, а таксама пісаць вершы. Гэтае сяброўства дае ёй моц змагацца са слепатою і дапамагае паэту адкрыць новыя грані творчасці.