З 1980-х гг. вядомы незалежны рэжысёр Джым Ярмуш здымаў жартоўныя кароткаметражныя фільмы-сцэнкі, у якіх героі сустракаюцца за каваю з цыгарэтамі ды абмяркоўваюць самыя банальныя тэмы штодзённага жыцця. Выніковы фільм «Кава і цыгарэты» ўтвараюць 11 эпізодаў, у кожным з якіх блізкія ці зусім незнаёмыя людзі спрабуюць (збольшага няўдала) дасягнуць паразумення адно з адным. Менавіта на сітуацыі непаразумення і грунтуецца злёгку абсурдны гумар гэтай культавай чорна-белай камедыі.