Польскі ваенна-сэнсацыйны сэрыял апавядае пра апошнія месяцы ІІ сусьветнай вайны. Падзеі разгортваюцца вясною 1945 г. Амэрыканская і савецкая выведкі ліхаманкава шукаюць сакрэтную дэшыфравальную машыну «Меч-рыба», пры дапамозе якой немцы ўзломваюць шыфры саветаў. Падзеі сэрыялу падводзяць гледача да самай вялікай таямніцы Трэцяга Рэйху – працаў нямецкіх навукоўцаў для стварэньня атамнай бомбы, якія вядуцца ў падземных лабараторыях у Судэцкіх гарах. Сьляды вядуць у замак Чоха ў Ніжняй Сілезіі. Сюды па заданьні саюзьнікаў прыбывае нямецкі капітан Ёган Ёрг, у сапраўднасьці – польскі шыфравальнік, каб знайсьці і выкрасьці ў немцаў дэшыфравальную машыну. Яму супрацьстаіць обэрштурмбанфюрэр СС Ганс Глёбке – кіраўнік аховы замку. На апарат палююць таксама саветы, якія маюць у замку свайго шпіёна. У чыіх руках застанецца «Меч-рыба»? Вялікае гістарычнае відовішча, якое трымае ў напружаньні да апошняе хвіліны.